بمناسبة موسم الامتحانات والجو الهستيري اللي الناس بدأت تعيشه او عايشينه على مدار سنتين ...ده بالنسبة للثانوية العامة ربنا يعينهم...حبيت اقولكم على الحوار ده...وهو حوار بين أستاذ بقصر العيني وابنه ليلة الامتحان
الابن : بابا....كلمت أونكل كعبورة اللي هايمتحنني
الأب : أيوة
الابن : قوله اني مش مذاكر أي حاجة خالص
الأب : حاضر
الابن : وقوله اني معرفش حاجة في العملي
الأب : قولتله وقال مش هايدخلك على عيانين خالص
الابن : وقوله اني مش هقدر اصحى بدري لأني هاسهر ، ياريت مايندهنيش في الأول زي ما بيعملوا معايا كل مرة
الأب : حاضر .. هقوله يندهك في الاخر
الابن : لأ مش عاوز أتأخر عشان خارج بعد الامتحان مع صاحبتي
الأب : مش كفاية انك هتمتحن في يوم غير يومك
الابن : وانا ذنبي ايه حد قال انكو تعملوا الامتحان ف وقت رحلة شرم
الأب : طب نعملك ايه ؟ عاوز تمتحن امتى ؟
الابن : قوله يستنى مني رنة عالموبايل ... لما أرن يندهلي
الأب : حاضر يا مغلبني
الابن : أنا ؟ مش كفاية ضيعتوني في النظري وماجبتوش كل الأسئلة
الأب : جايبلك 9 أسئلة من 10 ومش عاجبك ؟؟
الابن : جايبهالي قبل الامتحان بأسبوعين بس وكنت ساعتها في الرحلة وكمان الأسئلة طويلة ملحقتش أكتبها
الأب : ماحنا مصعبينها عشان باقي الطلبة مايحلوش وبعدين مانا جيتلك اللجنة ومديت الوقت لما غمزتلي ولمينا الورق في باقي اللجان
الابن : طب مابرضه في عيال عفاريت بيكتبوا بسرعة ومذاكرين كل حاجه
الأب : ماحنا عشان كده جايبين أسئلة في حاجات ملغية وكمان هيروحوا فين في الشفوي والاكس راي والاي سي جي ... دا يومهم بنعمل امتحان صعب جدا عكس يومكو اللي مابنصححش فيه
الابن : امال كنتو عايزين تصححو كمان ... دانا معرفش فيهم أي حاجة ... وبعدين مدام الشفوي والعملي حسموا الموضوع تقرفوني بمذاكرة كام سؤال نظري وتقعدوني في البيت أسبوع قبل الامتحان لييييه؟؟
الأب : ضمان ... وكمان لأن بعض الدكاترة طيبين بيدوا الطلاب الشطار درجات كويسة في الشفوي
الابن : بابا ... متقوله يديك الأسئلة اللي هيسألهالي عشان اعرفها لحسن كل مرة مجاوبش ولا سؤال وشكلي بيبقى وحش
الأب : أنا قولتله مايسألكش خالص
الابن : ينفع اني ماروحش الامتحان خالص بدل تعب الأعصاب اللي ببقى فيه
الأب : لأ يا روح أمك ... لازم تروح
6 comments:
ايه ده يا ميدو انت دكتور واللا ايه؟؟؟؟
انا اصلي دكتور بس مش القصر العيني
بس يا ميدو انتا مضلمها اوي.....مش اوي كدة لسه موصلوش للمرحلة دي
الله يضحكك يا شيخ
ازيك يا مصراوي عامل ايه؟؟
لا يا سيدي انا مش دكتور بس تقدر تقول ان انا معايا بكالوريوس طب (استماع) ..أصل اخواتي الاتنين في كلية طب وتقريبا كل اصحابي دكاترة....فتلاقي خبرتي الطبيه السمعيه خطيرة جدااااااااااااا
:p
السلام عليكم
ازيك يا عم الحاج ميدو مجدى
اخبارك ايه مش باين
كنت بتعدى تتطل علينا
هو ده اللى بيحصل واو تقدر تقول شبيه له فعلا
تدوينه كويسه
وعليكم السلام يا عم فاروتا
المدونة نورت ياسيدي
ايه الشرباتات اللي منجطه في الارض دي
:p
معلش والله الفترة اللي فاتت دي كنت مشغووووول جدا
انشاء الله هداوم على زيارتك الفترة الجاية
متحرمناش من نورك
واشمعنى القصر العيني
كنت قول في اي كلية طب في مصر كلها
هي الكوسة بقت بتفرق بين القصر العيني وغيرها؟
واشمعنى طب يعني؟
خلاااص مبقاش في حد احسن من حد والتوريث بقى في جميع المهن بلا استثناء بدءا بالطبيب ونهاية بالضابط
دة حتى الموظف الصغير بيتمنى ابنه يتعين في المصلحة او الشركة اللي هو فيها بدل ما يقعد في البيت عاطل
كلنا في الهم سوااااااء يا عزيزي
تحياتي واحتراماتي
قلبت عليا المواجع يا صاحبي
يبقي الواحد عمال يذاكر ويفحت ويردم طول السنة ويبص يلاقي واحد أهبل مبيعرفش يفك الخط طالع الأول عليك وواخد النيابة اللي كنت هتموت عليها مش لحاجة غير إن هو ابن أستاذ وانت لأ.
للأسف أصبحت سياسة التوريث تجري في كل مؤسسات الدولة حتي علي نطاق الجامعة .
الموضوع جامد أوي أحييك عليه
أخوك
خالد أبوالفضل
el-aseef.blogspot.com
Post a Comment