اتق شر الجاموس إذا غضب

مقطع الفيديو اللي انا حاطه النهارده ده...ممكن لو اتفرجت عليه بتركيز شوية...وحبة تفكير صغيرين...هتلاقي فيه عبر كبيرة جدا....للواقع الاسود اللي احنا فيه


الفيديو ده هتلاقي فيه عصابة من الأسود الظالمة اللي ماسكة البلد قصدي مسيطرة على الغابة وطايحة في الكل كبير وصغير...العصابة دي هجمت على قطيع من الجاموس الغلابة المطحونين فجأة.وكان رد فعل القطيع بكل بساطة انه جري وخاف وكل واحد قال وانا مالي والنتيجة كانت ان الأسود مسكت واحد منهم وبدأت تسن سنانها عشان تاكله....وطبعا ده كله في غياب كل قوى المعارضة ....قصدي في غياب بقية القطيع وصمتهم التام ولا حتى همسة

ونلاحظ كلنا انه ساعت ما كانت الأسود بدأت تقضي على المواطن الغلبان… قصدي الجاموسة الغلبانة…تدخلت القوى الخارجية وأبت إلا وأن تشارك الحكومة ….. يووووه….هو انا كل شوية اغلط….معلش….قصدي ان تشارك الأسود الوليمة…فنلاقي التمسااااااح وهو بيطلع من المية وبيمسك في الجاموسة بأيديه وسنانه …وآل اي لازم ياخد حته

طبعا ده كله في ظل استسلام الجاموسة وتسليمها بالأمر الواقع…..ولكن تأتي الرياح بما لا تشتهي الأسود

بعد سنين الظلام والظلم والطغيان اللي استحملها القطيع…..تجمعت قوى المعارضة لاول مرة في حياتها…..من اخوان وكفاية وغد…بتاع ايمن نور مش التاني….وناصريون وقوميون واشتراكيون……وقاموا قومة جاموسة واحدة قصدي رجل واحد….وقالوا لأ لاول مرة في حياتهم مع بعض……وهجموا على مجموعة الأسود اللي ماسكين البلد….قصدي اللي ماسكين الجاموسة الصغيرة ، وخلصوها من ايدين الأسود….وماكتافوش بكده وبس….لأ….دول هجموا على الأسود الفاسدة الظالمة وطردوهم برة البلدوخللصونا وخللصوا البلد من الشر والطغيان اللي عايشين فيه بقالنا سنين…..وعاشت الجواميس في تبات ونبات وخلفولنا جواميس وجاموسات …قصدي صبيان وبناتوتوتة توته خلصت الحدوتة

بقولكو ايه.....اسيبكم تكملوا بقية الحكاية على موقعنا ابناء مصر